សរទរដូវនៅទីក្រុងអូតាវាពិតជាស្អាតណាស់ ស្លឹកឈេីលឿង ក្រហម ទឹកក្រូច ចំរុះពណ៌ដណ្តេីមគ្នាជ្រុះឃ្លាតដាច់ពីមែក រសាត់អណ្តែតទៅតាមកំលាំងវាយោគ្មានទិសដៅ។
ខ្ញុំក្រឡេកមេីលទៅទិសខាងលិច ខ្ញុំឃេីញព្រះអាទិត្យបន្ទាបខ្លួនប៉ះផ្ទៃទន្លេ ស្ទេីរបាត់ស្ទេីរឃេីញ ព្រោះបាំងដោយពពកខ្មៅមួយផ្ទាំងធំ ហាក់ផ្តល់សញ្ញាឱ្យខ្ញុំប្រញាប់ចាក់ចេញ ព្រោះព្រះភិរុណអាចនឹងបង្អុរមកគ្រប់ពេល។
ជាការពិតណាស់ រដូវស្លឹកឈេីជ្រុះ ឬខ្មែរយេីងហៅថាសរទរដូវនេះ មេឃអាចផ្លាស់ប្តូរយ៉ាងរហ័សគ្រប់ពេល។ ពេលខ្លះមេឃស្រឡះ ពេលខ្លះមេឃស្រទំបាំងដោយពពក រកកលភ្លៀង ពេលខ្លះក៏រលឹមទាំងព្រឹក ឯពេលខ្លះទៀតខ្យល់បក់ខ្លាំងៗ បង្ខំឱ្យស្លឹកឈេីដែលទុំទាំងឡាយត្រូវតែជ្រុះធ្លាក់រាយប៉ាយពេញដី។
ទោះសភាពមិនប្រក្រតីនេះ ពិបាកឱ្យខ្ញុំស្មានពីសីតុណ្ហភាពប្រចាំថ្ងៃក៏ដោយ តែខ្ញុំនៅតែរីករាយ ទន្ទឹងរង់ចាំមេីលរដូវនេះតាំងពីដេីមខែសីហា ព្រោះខ្ញុំចង់ឃេីញភាពស្រស់ស្អាត នៃស្លឹកឈេីចំរុះពណ៌ទុំជ្រុះទាំងនោះ ដោយមិនបានខ្វល់ពីដេីមឈេីដែលនឹងត្រូវអស់ស្លឹកដ៏សោះកក្រោះទាំងនោះឡេីយ។ ផ្ទុះទៅវិញពេលដែលរដូវនេះចូលមកដល់ ខ្ញុំបែរជាមិនសប្បាយដូចការរំពឹងទុកទេ។ ព្រោះអារម្មណ៍ខ្ញុំពេលនេះបានហោះទៅរកម៉ែនៅឯជេីងមេឃម្ខាងទៀតបាត់ទៅហេីយ។
ដេីរចេញពីសួនឧទ្យាន ទាំងមិនអស់ចិត្តព្រោះខកខានឃេីញព្រះអាទិត្យលិច ខ្ញុំស្រាប់តែមានអារម្មណ៍ថារងាមួយរំពេច ព្រោះតែមានខ្យល់ត្រជាក់បក់មកជាមួយស្លឹកឈេីពណ៌លឿងទុំទេីលេីជេីងខ្ញុំ។ ខ្ញុំអោនរេីសយកមកកាន់រួចបន្តដំណេីរទៅមុខទៀត។
“ម៉ែ! នៅខាងនោះ ម៉ែយ៉ាងម៉េចហេីយ? ពេលកូនលឺដំណឹងម៉ែឈឺ កូនបាត់អស់ភាពរីករាយ។ ទីកន្លែងស្រស់ស្អាត រដូវកាលស្លឹកឈេីចំរុះពណ៌ ដែលកូនទន្ទឹង លែងមានន័យសម្រាប់កូនទៀតហេីយ! ម៉ែនៅខាងនោះ អាកាសធាតុអាចខុសពីកូន ព្រោះខ្មែរយេីងចូលខែភ្ជុំហេីយ ច្បាស់ណាស់ថា មានភ្លៀងរលឹមឥតដាច់ ផ្លូវអាចប៉ប៉េចប៉ប៉ាច មេឃស្រទំរហូត មែនទេម៉ែ? កូននៅទីនេះ បេីទោះពពកខ្មៅបាំងម្តងៗ តែនៅតែបេីកថ្ងៃ ហេីយថែមទាំងបន្ថែមភាពស្រស់ស្អាត ដោយមានស្លឹកឈេីចំរុះពណ៌ សប្បាយភ្នែកមេីលណាស់ ប៉ុន្តែហេតុអ្វីបានជាកូនមិនសប្បាយ? ហេតុអ្វីបានជាកូនយំ? ចុះម៉ែនៅខាងនោះហាក់អួអាប់ រលឹមសស្រិច ម៉ែថែមទាំងឈឺធ្ងន់ ហេីយម៉ែនៅឆ្ងាយពីកូនទៀត ហេតុអ្វីម៉ែនៅតែញញឹម? ម៉ែនៅតែសេីចសប្បាយដាក់កូន ពេលកូនទូរសព្ទទៅ?”
ខ្ញុំនិយាយក្នុងចិត្តរួចដកដង្ហេីមធំមួយ ដេីម្បីបន្ទូរអារម្មណ៍តានតឹង ពេលគិតដល់ស្ថានភាពម៉ែពេលនេះ។ ខ្ញុំដេីរបណ្តេីរ សម្លឹងមេីលស្លឹកឈេីដែលខ្ញុំបានរេីសបណ្តេីរ។
“ឬមួុយជាពេលដែលម៉ែត្រូវចាកចេញ? ស្លឹកឈេីទុំជ្រុះ មនុស្ស កេីត ចាស់ ស្លាប់ ជាច្បាប់ធម្មជាតិ តេីខ្ញុំត្រូវត្រៀមខ្លួនរស់ជាថ្មីដោយគ្មានម៉ែ ដូចដេីមឈេីសោះកក្រោះមួយនោះ ដែលរង់ចាំរដូវលាស់ស្លឺកថ្មីឬ? តេីខ្ញុំត្រូវត្រៀមចិត្តយ៉ាងណា ដេីម្បីទទួលយកច្បាប់ធម្មជាតិនេះ ដោយសុខចិត្ត ហេីយ មិនឈឺចាប់?”
គិតដល់ពាក្យ “សុខចិត្ត ហេីយមិនឈឺចាប់” ខ្ញុំឆួលច្រមុះ ដំណាលគ្នា និងទឹកភ្នែកហូរមកស្រូដូចទឹកបាក់ទ្រនប់ ព្រោះខ្ញុំនឹកឃេីញដល់ស្នាមញញឹម និង សំឡេងសេីចរបស់ម៉ែខណ:ពេលគាត់ធ្លាក់ខ្លួនឈឺ កំពុងព្យាបាលតែបែររីករាយឃេីញកូនៗជុំគ្នា។ ទង្វេីរបស់ម៉ែបានកំពុងបង្រៀនខ្ញុំឱ្យរៀន សុខចិត្ត រៀនទទួលយក រៀនលេីកលែងទោស។ ជីវិតម៉ែបានឆ្លងកាត់ព្យុះភ្លៀង ក្នុងទីងងឹតជាច្រេីនរាប់មិនអស់ តែចុងក្រោយនៃជីវិតម៉ែនៅតែញញឹម ទៅកាន់កូន ទៅកាន់មនុស្សគ្រប់គ្នា ដោយសេចក្តីស្ងប់។ តែកូននៅទីភ្លឺ នៅទីស្រស់ស្អាត ហេតុអ្វីក៏ពិបាកគ្រាន់តែញញឹម ដោយសុខចិត្ត ហេីយមិនឈឺចាប់ ដូចម៉ែ? អរគុណម៉ែ សម្រាប់មេរៀនមួយនេះ មុនពេលម៉ែត្រូវឃ្លាត។ កូននឹងព្យាយាមអនុវត្តន៍ មេរៀន សុខចិត្ត ពេញចិត្ត សប្បាយចិត្ត ស្រាយចិត្ត ស្ងប់ចិត្ត ដេីម្បីឱ្យចុងក្រោយនៃជីវិតកូន ពេលចាកចេញពីផែនដីនេះទៅ ជ្រះថ្លា ញញឹមរីករាយដូចម៉ែ។
ពិតណាស់ ដេីមឈេីជ្រុះស្លឹកគង់លាស់ត្រួយថ្មី ព្រះអាទិត្យលិចពីផែនដីគង់វិលវៃនៅថ្ងៃបន្ទាប់ មេឃខ្មៅអួអាប់គង់តែមានភ័ព្វ ជួបជួនប្រសព្វនឹងពន្លឺ។ យេីងដឹងហេីយថាជាច្បាប់ធម្មជាតិ ដូច្នេះមានតែយេីងរៀនរស់ដាក់ចិត្ត សម្របកាយ ទទួលយកលទ្ធផលជីវិតដោយសុខចិត្ត និងស្ងប់ចិត្ត ទេីបមិនសូវឈឺចាប់ពេលត្រូវបាត់បង ឬចាកចេញ៕ ~Amy
__________________
🍁 ខ្ញុំសូមអរគុណដល់ក្រុមការងារ មេសា -April ដែលបានសហការ និងគាំទ្រស្នាដៃដំបូងរបស់ខ្ញុំ។ ខ្ញុំក៏សូមអរគុណជាពិសេសដល់អ្នករចនាក្របសៀវភៅ ដែលត្រូវខ្លឹមសារ និងអត្ថន័យ ដូចអ្វីដែលខ្ញុំចង់បាន។
🍁ប្រិយមិត្តអ្នកអានអាចធ្វើការកក់ទុកដោយបញ្ជាក់លេខទូរសព្ទ អាសយដ្ឋាន និងចំនួនសៀវភៅក្នុង comment ខាងក្រោម ឬក្នុងប្រអប់សារនៅផេក មេសា-April
🍁តម្លៃសម្រាប់អ្នកកក់៖ តម្លៃ 28000 រៀល នឹងទទួលបានកាដូពិសេស ចាប់ពីថ្ងៃទី 06 ខែមិថុនា ដល់ថ្ងៃទី 16 ខែមិថុនា ឆ្នាំ 2020។
សានទិអេមីអាតាង 